跳到主要內容區塊
桃園市客家文化館在2008年8月開館營運,館舍用客家文學摎客家音樂做推廣核心,結合動靜態展示、客家表演藝術摎客家文化意象,展現獨特意涵。
目前開放參觀空間有客家文學館、客家音樂館、賴碧霞紀念專區、特展室、影音資料室、遊客服務中心還過親子探索館;戶外空間有日頭花假日廣場、草地音樂廣場、後方生態公園、沙坑遊戲區、伯公文化祈福區摎兒童遊戲區。

客語發音
 
崙坪文化地景園區在2019年11月開園,原本係日治昭和時期國際電話株式會社觀音崙坪受信所个所在地,後來由桃園市政府都市發展局將整體環境重塑,順應園區自然原貌,保留現有茂密樹林,變做桃園另一跡位祕境。園區分做龜殼劇場、中央大草坪摎客家工藝聚落這3區,其中个「客家工藝聚落」包含客家工藝館摎好客食堂,客家工藝館納入客家百工百業,包括木工、藍染、竹編、草編、服飾、家具等等,推動桃園客家工藝發展同傳承;「龜殼劇場」建置仿生龜殼木結構設施,提供展覽表演使用乜做得推銷文創產品這兜;「中央大草坪」除忒現有草坪摎綠蔭體驗以外,適合森林活動體驗,也做得辦理野餐、茶席這兜活動。

客語發音
 
鍾肇政文學生活園區在2019年4月開園,包含資訊站、大河學堂、以文會友講堂、鍾肇政舊居、幸福小學堂、龍潭武德殿這兜展區。毋單只有鍾老个作品閱讀摎藝術展示空間,也陸續開設文學導讀摎人才培訓課程,還過用原貌呈現「臺灣文學之母」鍾肇政先生頭過个創作摎生活場域,分民眾做得親臨感受這孕育臺灣文學巨擘還過推動臺灣文學發展个基地。

客語發音
永安海螺文化體驗園區在2022年3月開園,本館以「桃園海客文化」做為推廣重點,主體建築──海螺館係採取海螺曲線意象來做設計靈感,中庭地景藝術係用客家人歕海螺个聲來做發想,主建物脣个附屬建物係融入捉魚仔用个客家石塭來做設計概念,分完個建築還過較有海客風情。
館內特展室規劃豐富个桃園海客文化展示內容,分民眾認識頭擺客家族群在濱海地區移墾時節同其他族群个互動歷史,還過因應環境發展出農漁兼作个文化特色。

客語發音
桃園北區客家會館在2021年10月開館,本館以客家山歌、客家詩摎在地客家文化做為推廣核心,同時設有「客家詩人-杜潘芳格」還過「客家山歌國寶-賴碧霞」主題特展,希望透過兩位重要指標性人物傑出个藝術成就,持續來傳承推廣客家文學同音樂个靚。
館內租借空間包含音樂廳、音樂教室、舞蹈教室、多功能教室摎簡報室,提供民眾演練、研習還過展演个空間。

客語發音
1895乙未保台紀念公園在2021年11月開園,園區以景觀規劃喚起民眾對乙未戰爭个歷史記憶同時傳達客家義勇精神。公園左片半圓形地下建築物裡肚設有「乙未之環記憶展示廳」,用數位型態呈現乙未戰爭个史實同文獻,包含甲午戰爭、乙未戰爭還過桃園4大戰役(大湳尾戰役、安平鎮戰役、龍潭陂戰役、大嵙崁戰役)等等紹介;另外還設有戰場意象區、義民紀念牆摎祈福互動區,分民眾透過展示互動認識歷史記憶,同時感受客家族群保鄉衛土个英勇精神。

客語發音
「臺灣客家茶文化館」个位所就在產茶為主个桃園龍潭區:在國道三號高原交流道脣,交通十分利便。場館係用茶園地景、順應山排地形起起來个:係一個地下一層、地上兩棧个生態建築,來打造簡樸清寧个靚靚場館;超凡脫俗个建築設計,也得著咧美國繆思設計等等个大獎。場館內部个規劃設計係用「客家茶文化」摎「茶產業歷史」來做展覽个主線,還過用創新茶餐飲摎做得分大家體驗著各國啉茶文化个六國茶室做為特色,係臺灣茶路──浪漫台三線路項,分人定著會想去遶尞个亮點。

客語發音